今屆世界盃上星期開羅，因為呢度比俄羅斯慢6個鐘，我呢個師奶仔人生第一次唔洗半夜躝落床追波睇！
踢完第一場後，無論我有幾唔想知賽情都一定被成條街，所有餐廳，舖頭嘅電視loop住所有賽果。聽日即香港今晚D組阿根廷對克羅地亞，呢幾日喪loop喪倒數，令我諗起去年夏天，我同意佬去咗其中一個逃離埃及嘅歇腳地：克羅地亞。
克羅地亞嘅夏天熱得嚟沒有香港的濕悶熱，好舒服。托朋友的福租到一個露台有180度海景嘅準備出售樓盤。面對住地中海上方的亞得尼亞海，遠方的對岸就是意大利。夏季日長夜短，個天藍得像一張藍紙，偶爾一片薄雲只為作點點點綴。夜晚8點幾，肚仔開始餓先見太陽伯伯開始收工落山。企喺露台，前面汪洋大海好似要迎抱天空一片紫霞。意佬喜歡黃昏，佢話望住夕陽令佢覺得內心好平和。
我哋太喜歡呢間屋了，衝動得托朋友問業主點賣？雖然冇十年前咁抵，但二百萬港幣已可擁有呢個無敵海景仲要係低密度住宅區，流哂口水！請問喺香港要上車嘅朋友，如果間屋可隔住條罅睇到維港景的話，用二百萬買到個廁所？定係個廚房？
玩咗5日4夜，忍痛同間無敵海景屋講拜拜。如果真係買咗呢間屋，就算我哋一有假期，因為呢度有間屋咁就只會更少機會返意國探意媽，更未必會騰老遠返香港。再吸引嘅靚屋，始終都唔及一有機會就探探自己至親嘅動力。
落地生根計劃，或者遲幾年再諗吧。
#克羅地亞二百萬上車盤
#維港罅景的珍貴
#D組阿根廷對克羅地亞
#loop到你嫌煩
Search